కొలంబో: వైట్‌బాల్ క్రికెట్‌లో టీమిండియా సారథి విరాట్ కోహ్లీనే అత్యుత్తమ బ్యాట్స్‌మన్ అని శ్రీలంక పేసర్ ఇసురు ఉడానా పేర్కొన్నాడు. పరిమిత ఓవర్ల క్రికెట్‌లో కోహ్లీ గత దశాబ్దకాలంగా నిలకడగా రాణిస్తున్నాడు. ఐసీసీ వన్డే బ్యాటింగ్ ర్యాంకింగ్స్‌లో అగ్రస్థానంలో కొనసాగుతున్నాడు. ఇక అత్యుత్తమ బౌలర్ ఆస్ట్రేలియాకు చెందిన పేసర్ ‘మిచెల్ స్టార్క్’ అని ఉడానా చెప్పుకొచ్చాడు. లిమిటెడ్ ఓవర్స్‌ ఫార్మాట్‌లో టాప్ ఆల్ రౌండర్ భారత్‌కు చెందిన రవీంద్ర జడేజా అని ఉడానా వివరించాడు.
ఇంకా ఉడానా మాట్లాడుతూ.. ‘వైట్ బాల్ క్రికెట్‌లో కోహ్లీనే అత్యుత్తమని నా భావన. మిచెల్ స్టార్క్ బెస్ట్ బౌలర్. ఆల్‌రౌండర్ల విషయానికొస్తే రవీంద్ర జడేజాది అగ్రస్థానం’ అని మీడియా సమావేశంలో పేర్కొన్నాడు. టీమిండియా సారథి విరాట్ కోహ్లీని ఐసీసీ ఇటీవల ఈ దశాబ్దపు వన్డే ఆటగాడిగా ప్రకటించిన విషయం తెలిసిందే. కాగా, ఐపీఎల్‌లో ఉడానా ఆర్సీబీకి ప్రాతినిథ్యం వహిస్తున్నాడు. ఈ జట్టుకు కెప్టెన్‌ విరాట్ కోహ్లినే.