సిద్దిపేట జిల్లాలో లారీ డ్రైవర్ నిర్లక్ష్యపు డ్రైవింగ్ కారణంగా ఘోర రోడ్డు ప్రమాదం జరిగింది. ఒక్కడు మద్యం తాగి వాహనం నడిపినందుకు రెండు కుటుంబాలు ఇంటి పెద్దను కోల్పోయాయి. స్థానికంగా ఈసంఘటన అందర్ని ఎంతగానో కలచివేసింది. జీవితంలో ప్రశాంతమైన జీవితాన్ని అనుభవిస్తున్న దంపతులు ఓ వ్యక్తి నిర్లక్ష్యం కారణంగా బంధువు, ఆత్మీయులకు శాశ్వతంగా దూరమయ్యారు. మరో వారం రోజుల్లో విదేశాలకు ప్రయాణమైన వృద్ధ దంపతులు ప్రాణాల పాలిట యముడిలా దాపురించాడు ఓ లారీ డ్రైవర్. సిద్దిపేట జిల్లాలో జరిగిన రోడ్డు ప్రమాదంలో తప్పు ఒకరు చేస్తే, ముగ్గురికి శిక్ష పడింది. ఫలితంగా వాళ్ల బంధువులకు కన్నీటిని మిగిల్చింది. కరీంనగర్ పట్టణానికి చెందిన రిటైర్డ్ టీచర్ తాండ్ర పాపారావు, పద్మ దంపతులు కరీంనగర్ నుంచి ఓ ప్రైవేట్ కారులో హైదరాబాద్‌కు బయల్దేరారు. నాగుల మల్యాల కు చెందిన గొంటి ఆంజనేయులు కారు నడుపుతున్నాడు. మల్లారం శివారు ప్రాంతంలో ఎదురుగా రాంగ్‌ రూట్‌లో వస్తున్న లారీ కారును ఢీకొట్టింది. ఈదుర్ఘటనలో కారులోని డ్రైవింగ్ చేస్తున్న ఆంజనేయులతో పాటు దంపతులు పాపారావు,పద్మ అక్కడిక్కడే మృతి చెందారు.
లారీ డ్రైవర్ చేసిన నేరం..
ప్రమాదానికి కారణం లారీ డ్రైవర్ నిర్లక్ష్యమేనని మృతుల బంధువులు ఆరోపించారు. లారీ డ్రైవర్ మద్యం తాగి ఉండటమే కాకుండా రాంగ్‌ రూట్‌లో లారీని నడిపి వేగంగా కారును ఢీకొట్టడంతో కారు ముందు భాగం లారీ కిందకు దూసుకెళ్లింది. ప్రమాదంలో కారులోని ముగ్గురు చిక్కుకుపోయారు.సమాచారం అందుకున్న పోలీసులు ఘటన స్థలనికి చేరుకొని క్రేన్‌ సాయంతో కారును బయటకు తీయించారు. మృతులు పాపారావు, పద్మ దంపతులు మరో వారం రోజుల్లో అమెరికాకు వెళ్లేందుకు అన్నీ ఏర్పాట్లు చేసుకున్నారు. రెండేళ్ల క్రితమే విదేశాల్లో స్థిరపడ్డ కుమారుడు ప్రితమ్‌రావుకి కొడుకు పుట్టడంతో మనవడ్ని చూడాలని ఆశతో అమెరికాకు వెళ్లాలనుకున్నారు. ఈలోపే మృత్యువు వొడి లోకి చేరుకున్నారు.