ఢిల్లీలో ఘోర అగ్ని ప్రమాదం సంభవించింది. ఈ దుర్ఘటనలో 27 మంది మంటలకు ఆహుతి కాగా చాలా మంది తీవ్రంగా గాయపడ్డారు. దేశరాజధాని ఢిల్లీలోని ముండ్కా ప్రాంతంలో నాలుగు అంతస్తుల గల వాణిజ్య భవన సముదాయంలో శుక్రవారం సాయంత్రం 4 గంటల ప్రాంతంలో జరిగింది. ఈ ప్రమాదంపై సమాచారం అందుకున్న పోలీసులు, అగ్ని మాపక సిబ్బంది అక్కడకు చేరుకొని 30 అగ్ని మాపక యంత్రాల సహాయంతో మంటలు అదుపులోకి తీసుకొచ్చే ప్రయత్నం చేశారు. ఆ భవనంలో చాలా మంది చిక్కుకొని పోలీసులు భావిస్తున్నారు.
భవనంలో పలు కంపెనీల కార్యాలయాలు నడుస్తున్నాయి. సిసిటీవి కెమెరాలు, రూటర్లు తయారు చేసే కంపెనీలు మొదటి అంతస్తులో ఉన్నాయి. ఈ అంతస్తులోనే ఒక్కసారిగా మంటలు చెలరేగి దట్టమైన పొగ కమ్మేసింది. మంటలు మిగతా ఫ్లోర్లకు కూడా వ్యాపించాయి. గాయపడిన వారిని సంజయ్‌ గాంధీ ఆసుపత్రికి తరలించారు. 60 మంది సురక్షితంగా రక్షించినా ఇంకా చాలా మంది లోపల చిక్కుకుపోయారని పోలీసులు తెలిపారు. అయితే ఈ భవనానికి అగ్నిమాపక శాఖ నుండి ఎటువంటి సేఫ్టీ క్లీయరెన్స్‌ లేదని గురించారు. బిల్డింగ్‌ యజమాని మనీష్‌ లాక్రా పరారీలో ఉన్నాడు. ప్రమాదం జరిగిన మొదటి అంతస్తులో ఉన్న కంపెనీ యజమానులు హరీష్‌ గోయల్‌, వరుణ్‌ ను పోలీసులు అదుపులోకి తీసుకున్నారు.
ఈ అగ్ని ప్రమాద ఘటపై ప్రధానీ మోదీ, రాష్ర్టపతి రామ్‌నాథ్‌ కోవింద్‌, ఉపరాష్ర్టపతి వెంకయ్యనాయుడు, ఢిల్లీ ముఖ్యమంత్రి కేజ్రీవాల్‌ తీవ్ర దిగ్ర్భాంతి వ్యక్తం చేశారు. మృతుల కుటుంబాలకు తక్షణ సహాయం కింద రూ.2 లక్షలు, గాయపడిన వారికి రూ.50 వేలు పరిహారం ప్రకటించారు.