తెలంగాణలో భారీ వర్షాలు తీసుకొచ్చిన వరద కష్టాలు కాస్త తొలగినా ఆ వరదలు మోసుకొచ్చిన బురద క్లీన్ చేస్తుంటే కొత్త సమస్యలు ఎదురవుతున్నాయి. వరదలతో పాటు విషసర్పాలు నివాస ప్రాంతాల్లోకి కొట్టుకొచ్చాయి. అవి బురదలో కనిపించకుండా ఉండి, కాటేస్తున్నాయి. మంచిర్యాల జిల్లా కేంద్రంలో ఇలాంటిదే ఓ విషాద ఘటన చోటు చేసుకుంది. మంచిర్యాల జిల్లా కేంద్రంలోని మాతా శిశు ఆస్పత్రి గోదావరి తీరం చెంతనే ఉంది. ఇటీవల కురిసిన భారీ వర్షాలతో వరద ముప్పును ముందే గ్రహించి ఇక్కడి గర్భిణిలను, బాలింతలను సమీపంలోని ఇతర ఆస్పత్రుల్లోకి తరలించారు. ఊహించినట్టే భారీ వరద వచ్చి ఆస్పత్రిని ముంచెత్తింది. ఇప్పుడు గోదావరి వరద తగ్గడంతో ఆస్పత్రి సిబ్బంది పారిశుద్ధ్య చర్యలు చేపట్టారు. ఆస్పత్రిలోని ల్యాబరేటరీలు, అల్ట్రా సౌండ్‌ ఎక్స్‌రే యంత్రాలు, లేబర్‌ రూమ్ అన్నీ నీటిలో మునిగిపోయాయి. రూ.3 కోట్ల విలువ చేసే పరికరాలతో పాటు అత్యంత ఖరీదైన మందులు కూడా బురద పాలయ్యాయి. ఇదే సమయంలో వందలకొద్ది విష సర్పాలు వరదలకు కొట్టుకొచ్చాయి. అయితే, ఆస్పత్రిలో బురద క్లీన్ చేస్తుండగా ఈ పాములు బయటపడ్డాయి. అలా పరిశుభ్రం చేస్తుండగా ఓ కార్మికురాలు పాముకాటుకు గురయ్యారు.
సునీత అనే మహిళ మంచిర్యాల మాతా శిశు అసుపత్రి ఆవరణలో పారిశుద్ధ్య పనులు చేస్తుండగా బురదలో పొంచి ఉన్న ఓ విషసర్పం కాటేసింది. ఆమెను వెంటనే మంచిర్యాల ప్రభుత్వ ఆసుపత్రికి తరలించి చికిత్స అందిస్తున్నారు. ప్రస్తుతం ఆమె పరిస్థితి విషమంగా ఉందని డాక్టర్లు చెబుతున్నారు. సునీత అరోగ్యంపై కుటుంబ సభ్యులు అందోళన చెందుతున్నారు. కాగా, పాము కాటు ఘటనతో ఆస్పత్రిలో పారిశుద్ధ్య పనులు చేస్తున్న కార్మికులు భయంభయంగా ఉన్నారు
ఇదే ఆస్పత్రిలో ఆపరేషన్ థియేటర్ సమీపంలోని కిటికీకి మరో పాము చుట్టుకొని ఉండటం ఫొటోలో గమనించవచ్చు. వరదలతో పాటు క్రిమి కీటకాలు, విష సర్పాలు కొట్టుకొస్తాయి. ఆ వరద నీరు ఇళ్లలోకి వస్తే విషసర్పాలు ఇళ్లలో తిష్టవేస్తాయి. అందువల్ల ఇళ్లు శుభ్రం చేసుకునేటప్పుడు అప్రమత్తంగా ఉండాలి.