వాషింగ్టన్: అమెరికా అధ్యక్షుడు డొనాల్డ్ ట్రంప్‌కు ట్విట్టర్ షాకిచ్చింది. ట్రంప్ ట్విట్టర్ ఖాతాను శాశ్వతంగా నిషేధిస్తున్నట్టు ప్రకటించింది. ట్రంప్ తన సందేశాల ద్వారా హింసను ప్రోత్సహించే ఆస్కారముందని ఈ సందర్భంగా ట్విట్టర్ అభిప్రాయపడింది. ట్విట్టర్ వేదికగా ఇటీవల ఆయన ఇచ్చిన సందేశాలను నిశితంగా పరిశీలించిన తర్వాతే ఈ నిర్ణయం తీసుకున్నట్టు వివరించింది. కాగా.. అమెరికా అధ్యక్ష పదవికి నవంబర్ 3న జరిగిన ఎన్నికల్లో ట్రంప్‌పై జో బైడెన్ ఘన విజయం సాధించారు. అయితే ట్రంప్ మాత్రం తన ఓటమిని అంగీకరించక.. ఎన్నికల్లో అక్రమాలు జరిగాయని ఆరోపించారు.
ఈ క్రమంలో బైడెన్ ఎన్నికను ధ్రువీకరించడం కోసం బుధవారం రోజు యూఎస్ కాంగ్రెస్.. క్యాపిటల్ భవనంలో సమావేశం అయింది. ఈ సందర్భంగా ట్రంప్ ఇచ్చిన పిలుపుకు అప్పటికే వాషింగ్టన్ చేరుకున్న మద్దతుదారులు.. భవనంలోకి దూసుకొళ్లే ప్రయత్నం చేసి, అలజడి సృష్టించారు. ఈ క్రమంలో స్పందించిన ట్విట్టర్.. 12 గంటలపాటు ట్రంప్ ట్విట్టర్ ఖాతాను నిలిపివేసింది. తాజాగా ఆయన ఖాతాను శాశ్వతంగా నిషేధిస్తున్నట్టు ప్రకటించింది. ఇదిలా ఉంటే, బైడెన్ ప్రమాణ స్వీకారం చేసే వరకు.. ట్రంప్ ఫేస్బుక్, ఇన్‌స్ట్రాగ్రాం ఖాతాలను స్తంభింపచేస్తున్నట్టు ఫేస్బుక్ అధినేత మార్క్ జుకర్ బర్గ్ ప్రకటించారు.
